Gisugdan ang pagpatuman sa gun ban alas dose uno sa tungang gabii dungan sa pagsugod sa election period alang sa bugnong lugaynon sa Mayo 2022.
Sumala pa sa hepe sa kapulisan sa Davao City Police Office (DCPO) Colonel Kirby John Kraft nga hangtod alas 3:40 sa hapon adlawng Dominggo walay na-report nga nadakpang nakasupak sa implementasyon sa gun ban.
“As of 3:40 p.m, January 9, 2022 negative report gun ban violation on the ground,” sulti pa ni Kraft sa News Fort.
Una nang gimando ni Philippine National Police (PNP) Chief General Dionardo Carlos ang paglusad ug checkpoint operations sa mga strategic locations sa tibuok kapupud-an aron hugot mapatuman ang nationwide gun ban.
Subay sa Comelec Resolution No. 10728, suspendido ang tanang permits To Carry Firearms Outside of Residence (PTCFOR) nga gi-isyu sa licensed firearm holders, judicial entities ug miyembro sa government law enforcement agencies.
Ubos sa maong resolusyon, ang tanang prebilihiyo pinasikad sa PTCFOR nga gi-isyu sa PNP, suspendido sulod sa tibuok panahon sa election period hangtod sa Hunyo 8, 2022.
Suspendido usab ang permits nga gi-isyu sa PNP sa pagbiyahe sa armas, bala, explosibo,public firearms display and exhibits, ingon man employment sa mga security personnel alang sa mga VIPs.
Hulagway: NF Photo
Facebook Conversations