General Court-martial nga mutaral kang BGen. Durante, gimando

Kini human nalambigit si Durante ug mga sakop niini sa pagpatay kang Plaza sa Davao City niadtong Disyembre 28 sa gabii.

Sumala pa kang Brawner, ang maong lakang subay sa rekomendasyon sa board of inquiry (BOI) sa 10th Infantry Division nga nakabase sa Mawab, Davao de Oro nga maoy naglusad sa inisyal nga imbestigasyon sa kaso.

Giklaro sa hepe sa Philippine Army nga ang rekomendasyon sa BOI nga gisumite ngadto kaniya, gikinahanglan pang istudyuhan sa Judge Advocate General, ayha niya aprubahan. 

Pasabot ni Brawner, ang kamugnaan sa mamahimong miyembro sa General Court-Martial, agig pagpangandam lang kung ugaling taralon si Durante ilawom sa military Justice system. 

Sa pagkakaron, matod pa ni Brawner anaa pa lang sa pre-trial investigation stage, ug wala pay kasong nasang-at ang kasundaluhan kang Durante ug uban pang sundalo nga sabit  sa krimen.

Gawas kang Durante, unom pa ka mga sundalo nga sakop niini sa 100Ist infantry Brigade ang nalambigit sa krimen.

Nigawas sa imbestigasyon sa special investigation task group (SITG) nga  gimanduan ni Durante ang iyang deputy commander nga si Colonel Michael Licyayo nga magmugna ug team aron muhimo sa pagpatay kang  Plaza.

Pabiling wa igkita ang duha ka sundalo nga sila Private First Class (PFC) Rolly Cabal ug PFC Romart Longakit.

Una ng gibutyag sa 10th ID nga “awol” ( absent without official leave) ang estado ni Cabal samtang gikatahung gidagit si Longakit niadtong Enero 11.

Mismong ang drayber sa motorsiklo nga gigamit atol sa pagpatay kang Plaza nga si Corporal Adrian Cachero ug ang mitira nga si Sergeant Delfin Sialsa ang nagtumbok kang Durante nga maoy utok sa kamatayon ni Plaza.

Si Durante, kanhiay hepe sa presidential security group (PSG) sa niaging Administrasyong Duterte.