Niabot na sa 13.1 million ang ihap sa mga kabataang nag-enroll sa pampublikong tulunghaan sa tibuok nasod sa pagbukas sa klase karong Agosto.
Sa ulahing talaan sa Department of Education (DepEd) , anaa sa 13,152, 065 na ang kinatibuk-ang enrolled students hangtod Martes sa buntag (Agosto 2).
Sa maong ihap, 870,194 ang natala sa Kindergarten, 6,118,690 sa elementarya, 4,221,840 sa Junior High School, ug 1,940,621 sa Senior High School.
Pinakadakong enrollees pa gihapon ang Region 4A o CALABARZON nga anaa sa 1,979, 232 nga gisundan sa National Capital Region nga dunay 1,646,628, Region 3 o Central Luzon 1,309,625, ug Region 6 nga may 1,078, 510.
Gidasig sa DepEd ang mga ginikanan nga wala pa nagpa-enroll sa ilang mga anak nga muadto na sa mga eskwelahan sa ilang lugar sanglit mudawat pa gihapon ang ahensya ug mga enrollees hangtod Agosto 22.
Si Mayor Sara Duterte, nanguna sa 2022 National Brigada Eskwela Kick-off sa Imus Cavite, adlawng Lunes (Agosto 1). Hulagway gikan sa DepEd office
Facebook Conversations