Patay ang 37-anyos nga lalaki human pusila sa wala mailhing suspek samtang ang biktima nagbaktas sa dalang Arellano, Barangay 9-A ning syudad sa Davao Lunes alas 4 sa hapon, Hunyo 26.
Giila sa San Pedro Police Station ang biktima pinaagi sa iyang driver’s license nga si Jay Besin Jagunos, residente sa Mintal Relocation , Davao City.
Subay sa impormasyong nahipos sa mga imbestigador gikan sa mga testigos, nasayran nga tulo ka paka sa pusil ang ilang nadungog nga nikutlo sa kinabuhi ni Jagunos.
Usa matod pa ka lalaki nga nagsul-ob ug itom nga jacket, dunay gitas-on nga 5’7, ug anaa sa medium build ang gituhuang mipusil sa biktima. Daw sa waay ra nga nikagiw ang suspek human sa pagpamusil.
Narekober sa SOCO team ang duha ka fired cartridge cases sa kalibre 45.
Nadala pa sa Southern Philippines Medical Center si Jagunos apan paglabay sa kapin oras, hikabsan kini sa ginhawa.
Wa pa matumbok sa kapulisan ang motibo sa insidente.
Hulagway gikan sa Davao City Police Office
Facebook Conversations