Kapin 34,000 estudyante sa Davao Region, misalmot sa face-to-face classes; seguridad sa mga bata gisiguro sa DCPO

Sumala pa sa tigpamaba sa DepEd 11 Jenielito Atillo atol sa AFP-PNP Press Corps briefing adlawng Miyerkules (Marso 9) lauman pa ang pagdaghan sa mga eskwelahan nga tugutan nga mag-abri sa ilang pisikal nga klase kung mupasar sa mga sumbanan nga gitakda sa departamento.

Sa 164 eskwelahan nga gitugutang makalusad ug face-to-face classes, 41 dinhi anaa sa dakbayan sa Davao kalakip na ang nag-inusarang pribadong eskwelahan nga nag-pilot sa ilang F2F; 28 sa Davao de Oro; 36 sa Davao del Sur; 27 sa Davao Oriental; 2 ka pribadong eskwelahan sa Digos City; Island Garden Citynof Samal 3; Panabo City 3; ug 21 ka eskwelahan sa Tagum City, Davao del Norte.

Samtang 1,293 ka mga classrooms usab ang gigamit alang sa F2F classes ug muabot sa 2,879 magtutudlo nga bakunado batok sa COVID-19 ang gitugutan sa departamento nga pisikal nga makatudlo.

Dugang ni Atillo nga daghan pang eskwelahan ang nagpadayag ug intensyon nga magbukas sa ilang face-to-face classes ilabina sa Davao City.

“Naa pay daghan nag-apply but subject  to evaluation,” matod pa ni Atillo.

Gikonsidera sa DepEd nga welcome move alang sa ahensya ang kamanduan ni Mayor Sara Duterte nga no objection  sa tanang aplikasyon sa face-to-face classes gikan sa Kindergarten hangtod sa post graduate studies.

“It’s very good that the executive order of mayor  Inday Sara interposing the  objection to all the applications has been out and it is a very welcome move, but  this is just one of the requirements for all the schools to be given  the authority for the implementation of the face to face,” ingon ni Atillo.

Sumala niini, gikinahanglan gihapon motuman ang mga eskwelahan sa gitakda nga safety assessment tool una kini tugutan nga makalusad ug F2F classes.

Gawas niini, kinahanglan usab nga dunay pagtugot sa mga ginikanan ang mga bata nga mosulod sa F2F classes.

Gipasabot sa opisyal nga dili mamahimong rekisitos ang pagbakuna batok COVID-19  sa mga kabataan nga muapil sa pisikal nga pagtudlo.

Bugtong mga bakunadong maestra  lamang usab ang tugutang makatudlo sa aktwal. 

Samtang, gipaniguro sa Davao City Police Office (DCPO) nga dunay mga miyembro sa pulis ang ideploy alang sa seguridad sa mga kabataang  motungha.

“Meron tayong naka-detail na mga pulis sa mga eskwelahan especially early in the morning para mag-assist sa mga bata sa pagtabok, until 9 a.m sila and mubalik alas 3 sa hapon hangtod alas 6 sa gabii aron mo-assist sa  flow sa traffic ug sa mga bata nga mutabok,” matod pa sa tigpamaba sa DCPO Major Ma. Teresita Gaspan.

Giasoy ni Gaspan nga duna usay mga mobile cars ang nakatoka sa  mga eskwelahan nga tugutang makahimo sa F2F classes.