Suspek sa paglugos-patay kay Architect Bragas, patay sa operasyon

Kung kahinumduman, si Bragas nakit-ang wa nay kinabuhi niadtong niaging Mayo 17 sa buntag nga gitabunan ug laya nga dahon sa saging sa plantasyon sa  Purok 6, Barangay Dacudao.

Ang napatay nga suspek mao ang gipangita sa otoridad kinsa unang ginganlan isip “John Doe”.

Basi sa imbestigasyon sa kapulisan, ang maong “john doe” giila sa tinuod nga pangalan nga si Jimmy Bayantong Lobiano, hamtong ang pangidaron, ug residente sa Purok 11, Upper Sirib, Calinan Dist., Davao City.

Nasayran nga nisukol sa mga otoridad si Lobiano atol sa pagsilbi sa warrant of arrest sa kasong lugos hinungdan nga niresulta sa komprontasyon.

Nigawas sa imbestigasyon, si Lobiano mao sab ang gitudlo nga nanghilabot sa pag-umangkon sa iyang asawa nga dunay deperensya sa pangisip.

Narekober sa crime scene ang ongbak nga gisakyan ni Bragas, pipila ka oras ayha nakita ang patayng lawas niini.

Nakita sab sa kapulisan sa Calinan ang usa ka pares sa aryos nga iya ni Bragas sa mismong ongbak.