Kinasa ng Bangsamoro Autonomous Region in Muslim Mindanao o BARMM ang Measles Outbreak Response
Immunization (MORI) noong Abril 1 matapos nitong mag-deklara ng outbreak ng tigdas nung kalagitnaan ng Marso. Bago pa man nagsimula ang outbreak, naitala na ang higit sa 500 kaso ng tigdas sa rehiyon – halos kahalati na ng naitalang kaso sa buong rehiyon noong 2023. Maaring mas mataas pa ang bilang ng kaso – isang nakakabahalang realidad para sa isang rehiyong mataas ang pangarap para sa mga kabataan at sa kanilang kinabukasan.
Pinahaba pa ang orihinal na dalawang linggo na MORI. Dahil magkakaiba ang antas ng pakikilahok mula sa mga lokal na opisyal, hindi rin pantay pantay ang numero ng mga nabakunahang kabataan.
Ang mga health worker ay pagod na rin habang sila ay nagbabahay-bahay sa gitna ng mainit na panahon dulot ng El Niño. May mga magulang din na tumangging pabakuahan ang kanilang mga anak dahil sa iba’tibang dahilan tulad ng maling impormasyon. Ang iba ay napagod na dahil sa pagpapaturok ng iba’t ibang bakuna.
Isang taon bago ang parliamentary na eleksyon sa rehiyon, ang kalusugan ng libo-libong kabataang Bangsamoro ay nanganganib. Higit sa pag kontrol ng outbreak ng tigdas, ang mga routine vaccines ng mga bata gaya ng polio at diphtheria ay kailangang maibigay para makamit ang herd immunity at mapabuti ang kinabukasan ng mga Bangsamoro. Ang rehiyon na ito ang may pinaka mababang antas ng kalusugan, nutrisyon, edukasyon at kagalingan kumpara sa ibang kabataan sa ibang parte ng Pilipinas.
“Ang pagbabakuna ay isa sa mga kritikal na bahagi ng isang matatag na health system. Sa ika-50 anibersaryo ng Essential Programme of Immunization, nagmula tayo sa isang mundo na ang pagkamatay ng isang bata sa pamilya ay isang bagay na inaasahan ng mga magulang, sa isang mundo na ang bawat bata ay may pagkakataong mabuhay kung siya ay mababakunahan. Upang sugpuin ang outbreak, inaanyayahan namin ang ating mga lider na pumunta sa mga pinaka mahirap na komunidad para kanilang makita ang mga hamon na nararanasan ng mga pamilya at mga health workers,” sabi ni UNICEF Philippines Representative Oyunsaikhan Dendevnorov.
Bilang suporta sa outbreak ng tigdas at tuspirina, ang UNICEF ay tumutulong sa pagbili ng 2 milyong dose ng bakuna laban sa tigdas, pagpapadala ng mga immunization coordinators, cold chain managers at social mobilizers sa mga probinsyang nangangailangan ng tulong, pakikipagtulungan sa community leaders upang ipaliwanag na ang mga bakuna ay ligtas at halal, at pagpapatayo ng mga cold room upang mapanatiling epektibo ang mga bakuna.
Isang milyong dose ng bakuna ang inaasahang dumating sa Pilipinas sa mga darating na linggo. Ang susunod na 1 milyong dose naman ay darating sa mga susunod na buwan.
Upang masugpo ang mga sakit na maaring maiwasan gamit ang mga bakuna, tinatawagan ng UNICEF ang national at regional government na solusyunan ang mga hamon sa supply at demand. Dapat nitong ayusin ang isyu ng stock-out ng mga bakuna, mag-hire pa ng maraming vaccination teams, bigyan ng karagdagang suporta at sapat na sweldo ang mga barangay health workers, at paghandaan ang mga dagok na maaring dumating gaya ng sakuna at climate change. Sa usapan ng demand, dapat nitong pagtibayin ang social preparation sa mga komunidad bago magsagawa ng mga immunization campaign, pagbutihin ang social listening, at pag-igtingin ang pakikipag-tulungan sa mga community influencers. Tinatawagan ng UNICEF ang gobyerno, mga lider sa komunidad, civil society, pribadong sektor, mga magulang, at ang buong pamayanan na magtulungan upang ang bawat bata ay hindi lang mabuhay kundi magtagumpay.
Facebook Conversations