Gibutyag sa Philippine National Police (PNP) nga naminusan ang ihap sa mga Private Armed Groups (PAG) nga posibleng mahimong hulga sa Barangay ug Sanguniang Kabataan Elections (BSKE).
Sumala pa kang PNP Public Information Office Chief Police Brigadier General Red Maranan, 42 nalang ang ilang gibantayang PAG, gikan sa kanhi 49.
Kini human nga nabungkag sa PNP ang pito ka mga dagkong PAG, sa pagpatuman sa kamanduan ni PNP Chief Police General Benjamin Acorda nga gukdon ang mga armadong grupo nga posibleng magsinamok sa BSKE.
Gipasalig ni Maranan nga puspupusan ang pagbantay sa PNP sa mga election hot spots kundiin lauman ang init nga bangi sa politika.
Sa pagkakaron, 27 ka lugar ang anaa sa “areas of grave concern” nga posible pang mapun-an depende sa mamahimong sitwasyon samtang taliabot na ang eleksyon.
Facebook Conversations