Human sa bahog-bahog, sundalo ug MILF sa Basilan, nagkumustahay, nagginaksanay

Ruth Palo

Editor

posted on 3 years ago — updated on 1 second ago

803
views

Nagkinumustahay ug nag-ginaksanay si 64th Infantry Battalion Commander Lieutenant Colonel John Ferdinand Lazo, ug Commander Huram Malangka sa Moro Islamic Liberation Front- Bangsamoro Islamic Armed Forces (MILF-BIAF), human sa nahitabong engkwentro sa niaging semana tali sa ilang tropa.

Ang pag-inamiguhay sa duha ka lider sa militar,gisaksihan ni Office of The Presidential Adviser for Peace, Reconciliation, and Unity (OPAPRU) Secretary Carlito Galvez Jr.

Kini human sa “peace dialogue” tali sa Government Peace Implementing Panel (GHP), Armed Forces of the Philippines, Moro Islamic Liberation front (MILF), ug mga miymebro sa Coordinating Committing on the Cessation of Hostilities (CCCH) sa gubyerno ug MILF, niining adlawng Lunes sa Isabela, Basilan.

Sumala pa kang Galvez, ang tulo ka adlaw nga bakbakanay tali sa sundalo ug MILF sa Barangay Ulitan, Ungkaya Pukan, Basilan niadtong niaging semana gihulagway nga “unfortunate”, apan napamatud-an matod pa nga epektibo ang “peace mechanisms” aron maresolba ang problema.

Kahinumdumang nagsugod ang bakbakan tali sa mga tropa sa gubyerno ug MILF Nobyembre 8 sa udto human gipabuthan sa sniper sa MILF ang mga tropa sa kasundaluhan nga anaa sa lugar aron gukdon ug pangitaon ang mga lawless elements.