2 sundalo nga suspek sa pagpatay sa modelong si Plaza, nag-“awol”, gipangita na

Sumala pa ni Captain Mark Tito, tigpamaba sa 10th ID nga “awol” (absent without official leave) sila Private First Class (PFC) Rolly Cabal ug PFC Romart Longakit.

Si Plaza, gipusil patay sa gawas sa giarkilahang balay niini sa Green Meadows Subdivision, Barangay Sto. Niño, Mintal, Davao City, 7:30 sa gabii niadtong December 28,2022.

Si Cabal ug Longakit, kalakip sa pito ka sundalo nga gitudlong nalambigit si pagpatay kang Plaza, 38 anyos.

Nauna nang gitudlong mastermind sa pagpatay kang Plaza si Brigadier General Jesus Durante, kumander sa 1001st Infantry Brigade nga nakabasi sa Maco, Davao de Oro.

Kanhi usab kini nangulo sa presidential security group  sa administrasyong Duterte.

Basi sa imbestigasyon  sa special investigation task group (SITG)-Plaza, milutaw nga dunay relasyon ang modelo ug heneral subay sa mga nahipos nga ebedensya.

Si Durante mismo ang nagmando sa iyang deputy brigade commander nga si Colonel Michael Licyayo nga likidahon si Plaza.

Mismong ang drayber sa motorsiklo nga gigamit atol sa pagpatay kang Plaza nga si Corporal Adrian Cachero ug mismong ang mitira nga si Sergeant Delfin Sialsa ang nagtumbok kang Durante nga maoy utok sa kamatayon ni Plaza.

Matod pa ni Tito, gisubay na sab sa gimugnang board of inquiry ang rason sa pag-awol ni Cabal. Samtang si Longakit, nauna nang gikatahong gidagit sa wa pa matino nga rason.

Gawas sa pito, duna pay duha ka indibidwal nga wala pa mailhi ug usa ka sibilyan nga si Noel Japitan nga nagsilbing “striker”.

Una nang gibutyag ni Philippine Army Commanding General Lieutenat General Romeo Brawner, Jr. nga wala niini gina-tolerate ang kasaypanan o criminal acts bisan unsa pang ranggo ma-opisyal man o enlisted personnel susama ra kuno ang pagtratar.

“So nung nalaman po natin na meron pong report na ganito at person of interest si General Durante at kaagad agad nagconference po kami and then we decided na tangalin muna sya sa pwesto bilang commander ng 1001st brigade so that yung investigation po ay magiging impartial and thorough,” Matod pa ni Brawner sa interbyu sa DZBB.

Sa pangutana kung ihatag ba sa militar ang kustodiya sa Philippine National Police (PNP) sa mga akusadong sundalo, sumala ni Brawner, “meron po tayong proseso din sa miltiary justice system natin na sasampahan rin po sila ng kaso under the military justice system.”

“Magkakaroon ng court martial and we will have custody over them, meron po tayong custodial center parang kulungan din, oo, so posible na mapunta po sila dun for their safekeeping habang dinidinig po yung kaso nila,” dugang pahayag ni Brawner.

Matod pa sa opisyal, mag-atubang sab ug kasong administratibo ang mga akusado ug ang military court na ang maghukom labot sa ilang posisyon, ug benepisyo.

Anaa karon sa kustodiya sa headquarters sa Philippine Army sa Fort Bonifacio sa Taguig City si Durante ug Licyayo samtang si Sialsa, Plaza, ug Cachero anaa sa puder sa 10th ID sa Mawab, Davao de Oro.