Subay sa report sa Davao City Police Office (DCPO), gilabni sa suspek ang bag nga dunay kuwarta ug alahas.
Ang Biktima giila nga si Mary Joy, molopyo sa Mañalac, New Pandan, Panabo City.
Nasayran nga giingong gikan naghatud sa gibaligyang scrap metals sa usa ka dakong steel corporation sa Ilang ang biktima sakay sa usa ka Isuzu Elf nga gimaneho iyang kapuyo nga si Dino.
Pauli na sa Panabo ang biktima human sa ilang transaksiyon. Apan Nasayrang giharang matud pa ang ilang trak sa duha ka tawong sakay sa motorsiklo ug niingong duna sila'y traffic violation.
Mikanauag si alyas Dino matud pa sa trak base sa mando sa naka- motor apan ang angkas, niadto sa passenger side ug gikompronta sa biktima nga miresulta sa komosyon. Nadungog na lamang ang buto sa gituohang armas ug nakita ang back rider nga bitbit na niini ang bag ni Mary Joy nga dunay sulod nga kapin P200,000 ug mga alahas.
Paspas nga misibat ang mga sakay sa motorsiklo sa wala matino nga direksiyon.
Gideklara sa 911 Emergency team ang biktima nga wa na'y kinabuhi human nakahiagom ug pinusilan sa ubos sa iyang gusok.
Narekober sa kapulisan ang usa ka baseyo sa .45 nga pistola ug upat ka singsing nga iya sa biktima.
📷 DCPO