Subay sa FaceBook post sa tigpamaba sa DepEd11 Jenielito Atillo , gibutyag niini nga walay puas ang ilang koordinasyon sa lokal nga panggamhanan sa Marikina partikular sa ilang disaster and rescue office, kapulisan, ug uban pang grupo aron mahibal-an ang kahimtang sa syudad matag karon ug unya alang sa sakto ug hinanaling aksyon.
Busa, gipahimangnuan niini ang mga ginikanan ug mga mahal sa kinabuhi sa Davao Eagle Athletes, Coaches, Chaperons, delegation staff ug mga opisyal nga mukalma ug dili mabalaka.
Sumala ni Atillo, upat ka kilometro ang distansya sa billeting school, Concepcion Integrated School sa Marikina River nga maoy tinubdan sa tubig-baha busa layo-layo ra sa posibilidad nga makasinati sila ug pagbaha.
“Buot namong ipahibalo nga isip precautionary measure, nagmando si RD Allan Farnazo nga sugod kaganinang buntag, alas 4 sa sayong kabuntagon (Huwebes, Hulyo 27) wala nay bisan usa ka atleta ang gitugutan nga mugawas sa billeting quarter aron masiguro ang safety sa tanan,” ingon sa opisyal.
Dugang ni Atillo, lig-on ang sistema nga gipatuman ug gilatag sa pagbantay ug pagpangandam alang sa security ug safety sa DAVRAA Delegation.
“Buot natong mahibal-an sa tanan nga ang lokal nga gobyerno sa Marikina kanunay nga naga monitor kanato ug nagsiguro sa paghatag sa ilang atensyon ug ayuda sa sa tanang panahon,” matod ni Atillo.
Ang DAVRAA, dunay 573 delegasyon nga milangkob sa atleta, coaches, ug ilang mga chaperons.
Sa maong ihap, 446 mga atleta, 97 coaches, ug 30 chaperons.