Sumala pa ni Major Catherine Dela Rey, tigpamaba sa kapulisan sa Davao City atol sa AFP-PNP Press Corps briefing sa The Royal Mandaya Hotel adlawng Miyerkules (Oktubre 19) nga sugod Oktubre 29 sugdan na sa Davao City Police Office (DCPO) ang ilang deployment sa nagkadaiyang sementeryo sa dakbayan.
Sumala pa ni Dela Rey, Oktubre 30, abri ang gate sa mga pampublikong sementeryo alas 6 sa buntag ug siradhan alas 8 sa gabii. Apan ang mga pribadong lubnganan mamahimo sila nga maka-extend ug oras apan walay tugutan nga mag-overnight.
Mag-instular usab ug police assistance desk ang DCPO sa 37 ka mga pribado ug publikong sementeryo.
Malaumon si Dela Rey nga mutamod ang publiko sa guidelines ug protocols ilabina ang dili pagdala ug backpacks, pagsuot ug jackets, pagdala ug mahait nga butang, gambling paraphernalia, videoke, ug ilimnong makahubog.
Gimanduan usab ang tanan sa pagsuot ug face masks.
Samtang, gipasidan-an sa Police Regional Office (PRO) 11 ang tanang unit commanders nga istriktong ipatuman ang gipagula nga memorandum labot sa operational guidelines sa all soul’s and all saint’s days.
Unod sab sa guidelines ang pagpatuman sa health protocols.
Sumala pa ni Major Eudisan Gultiano, tigpamaba sa kapulisan sa rehiyon nga gimanduan sab ang tanang mga provincial ug city directors sa pakig-alayon sa mga local government units aron hapsay ug malinawon ang kalag-kalag.
Magmugna sab ug checkpoints ang kapulisan sa mga major routes paingon sa mga sementeryo, dugang ni Gultiano.
Matod pa ni Gultiano, duna usay mugnaon nga critical incident management task group nga ang katuyuan mapugngan ang unsa mang untoward incidents.
Sa bahin sa kasundaluhan, gibutyag ni Captain Mark Anthony Tito, ang hepe sa Division Public Affairs Office (DPAO) sa 10th Infantry Division nga mualalay sab ang kasundaluhan sa over-all security alang sa Undas 2022.
Matod pa ni Tito, andam sila muresponde kung unsa ang gikinahanglan sa kapulisan. Apan anaa matod pa ang Task Force Davao nga muabag sa DCPO sa paghatag seguridad sa mga lubnganan.
Samtang ang Traffic Enforcement Unit (TEU) sa DCPO, mupakatag sab ug 88 gikan sa 94 nila ka mga personahe aron pag-asister sa traffic direction and control sa mga major cemeteries sa syudad. Gikan sa pag-abri sa gate hangtod sa pagsirado, gipaniguro ni Major Dexter Domingo, hepe sa TEU, nakaalalay ang iyang personahe dili lang sa traffic direction kun dili lakip na sa paghatag basic risk visibility sa area kaabag ang territorial ug jurisdictional station commanders sa kapulisan.
Matod pa ni Domingo, duha hangtod upat matag sementeryo sa syudad sa Davao dunay personahe sa TEU ang gi-assign.