Subay sa anunsyo sa NORDECO sa ilang FB Page hapon sa adlawng Lunes (Abril 25), mitaas ang taripa sa 14.7298 matag kilowatt-hour (kwh) tungod sa pagsaka sa generation charge ug value added tax.
Ang generation charge mitaas ngadto sa P9.0176 matag Kwh gikan sa P8.7129 matag kwh sugod niadtong bulan sa Marso 2022 ning tuiga. Adunay pagtubo nga P 0.3047 per kwh.
Matod pa sa NORDECO, ang pagsaka sa generation charge epekto sa pagsaka sa fuel cost per kwh sa mga Power Suppliers sa electric cooperative.
Dugang sa NORDECO, ang fuel cost (weighted average) sa coal-based power plants misaka ngadto sa P 4.7367 per kwh sa Abril 2022 gikan sa P4.4080 per kwh sa miaging bulan.
Samtang ang diesel-based power source, misaka usab ngadto sa P 17.8794 kwh sa bulan sa Abril 2022 gikan sa P15.0386 per kwh sa Marso.
Dugang pagpasabot sa NORDECO, ang kuryente nga ilang napalit gikan sa coal-based power plants anaa sa 78.84% samtang ang sa diesel-based power sources naa sa 5.14%.
Ika-duhang rason sa pagtubo sa taripa mao ang pagsaka sa Value Added Tax (VAT).
Ang VAT mitaas sa P 1.5004 matag kilowatthour sa Abril 2022 gikan sa P 1.4037 matag kwh sa Marso 2022.
“Gawas sa taripa sa kuryente, ang pagsaka o pag-ubos sa binulan nga bayronon sa kuryente duna usab kalambigitan ang nakonsumo o kwh used nato sulod sa pila ka adlaw o period covered nga makita sa taas nga bahin sa power bill,” matod pa sa NORDECO.
Dugang pagpasabot sa NORDECO, kapin kon kulang 71% sa makolekta niining bayad gikan sa member-consumer-owners (MCOs) ang maadto sa Generation ug Transmission Charges nga padulong sa mga Generation ug Transmission Companies, kapin kon kulang 15% maadto sa gobyerno nga balayronon, ug kapin-kulang 14% lamang ang alang sa NORDECO.
Kini pa ang unang higayon nga nagtaas sa bayrunon sa koryente ang NORDECO nga kanhiay Davao del Norte Electric Cooperative (DANECO) sukad sa tuig 2012.
Giklaro sa NORDECO nga ang Generation ug Transmission Charges lakip na ang obligasyon sa electric cooperative sa gobyerno managlahi kada bulan.
Nangayo ug pagsabot ang NORDECO sa libuang mga MCOs lukop Davao del Norte ug Davao de Oro sa nahitabong pag-usbaw sa taripa.