Sa mensahe sa gobernador sa iyang Facebook account, gibutyag niini nga adunay i-serve kaniya nga preventive suspension order karong adlawa, Huwebes, April 11, 2024, gikan sa Office of the President (OP).
Matod sa opisyal dili kini makatarunganon, sanglit wala siya masayod kung unsa ang basehan sa order. Wala say pahibalo nga duna siya’y bag-ong kaso sa korte o tawag man lang gikan sa OP. Labaw sa tanan walay nahitabong imbestigasyon sa Department of Interior and Local Government (DILG) batok kaniya.
“…klaro gyud kaayo ang injustice kay kini wala miagi sa sakto nga proseso sa balaod o due process of law,” pahayag sa opisyal.
Subay sa balaod, katungod sa usa ka indibidwal nga hatagan ug due process, nga subling gigarantiya sa Rule 6, Section 3 sa Administrative Order No. 23, Series of 1992.
“Ang preventive suspension ipagula lamang kung ang respondent o kiniha nakahatag na og tubag sa kaso batok kaniya, kung duna gayu’y bug-at nga ebidensya sa pagkasad-an, ug kung dunay dakong posibilidad nga ang pagpadayon niini sa puwesto makaimpluwensiya sa mga testigo ug naghatag hulga sa kahilwasan ug integridad sa mga ebisensiya,” dugang sa gobernador.
Gipamugos sa opisyal nga wala siya’y laing gihimo kundili ang paghatag og tinuoray nga serbisyo alang sa pag-uswag sa kinabuhi sa mga Dabaonon ug sa paglambo sa ekonomiya sa Davao del Norte.
Nangayo ug suporta ang gobernador sa katawhan pinaagi sa ilang presensya sa pag-adto sa Kapitolyo karong buntag sayo aron batokan ang maong lakang sa pag-serve sa suspension order.
“Kita mubarog para atong batokan ang mga dautan nilang mga plano… Dili nato tugutan nga magmadaugon ang dautan batok sa matarong,” sulti niya.
“Dili nato tugutan nga ang maghari niining Davao del Norte, mga tao nga walay laing tumong kundili ang gahom og proteksyon sa ilang sariling interes og paghimo og pagpangabuso ug pagdaug-daug sa katawhan,” dugang sa gobernador.
Governor Edwin Jubahib