Subay sa pagduki-duki sa Sta. Cruz Municipal Police station sa amahan sa biktima, Geoffry Cabisa, 47-anyos , usa ka game fowl handler nga samtang ang iyang siyete anyos nga anak ug ang dies-anyos nga suspek nagdula sulod sa usa ka farm nga gipanag-iyanan ni Joel Lasib, nakita matod pa sa suspek ang improvised homemade handgun ug tungod nagtuo kini nga dulaan ra, iya kining gition ug gipabuto tumong sa dughan sa biktima nga nakaingon sa kamatayon sa siyete anyos.
Ang dies anyos nga suspek anaa na sa kustodiya sa Womens and Children and Protection Desk.
Nakuha sa kapulisan sa crime scene ang pusil lakip na ang baseyo sa 9mm.
Anaa na gihaya sa lokal nga punerarya ang patayng lawas sa biktima.
Ang inahan sa biktima nga usa ka Overseas Filipino Worker (OFW) sa Saudi Arabia, nangayo’g tabang nga makapalit kini ug ticket sa eroplano aron makauli sa Pilipinas ug masud-ong ang anak sa katapusang higayon.