Tuig 2021 gisugdan ang konstruksyon sa multi-milyon nga fishport nga gipondohan sa Philippine Fisheries Development Authority (PFDA) og P75 million. Unang hugna pa lamang sa konstruksyon kini diin pagasugdan na usab ang ikaduhang hugna nga pondohon og P150 million gikan lamang gihapon sa PFDA.
Ang unang hugna sa fishport nagtanyag sa managlahing pasilidad sama sa reclamation, concreting, fencing, drainage ug sewerage systems, water ug electrical distribution networks, administrative offices, ug trading/market hall.
Mitambong sa opening sila Mayor Michelle Nakpil Rabat, Vice Mayor Lorenzo Leon G. Rabat, City Administrator Allan Andrada, City Councilors, ug ang PFDA team nga gipangunahan ni General Manager Atty. Glen A. Pangapalan, Asst. General Manager Iris de Vera, Engineering Manager Dani Axalan, Planning Manager Gina Reyes, Finance Manager Jose Ruiz Jr., Navotas Fish Port Complex Port Manager Luiz Ortiz, ug Davao Fish Port Complex Port Manager Albert Aguinaldo.
Nagpasalamat si Rabat sa tabang sa PFDA ingon man sa uban pang mga opisyal na namahimong instrumento aron mapondohan ug matapos ang fishport sama nila kanhing Presidente Rodrigo Duterte, kasamtangang Presidente Ferdinand Marcos Jr., Davao City 1st District Representative Paolo Z. Duterte ug Presidential Assistant for Eastern Mindanao Leo Tereso Magno.
Gilaumang tubag ang fishport sa mga panginahanglan sa gibana-banaang dos sientos (200) ka komersyal nga mga barko sa pangisda ug makapauswag sa industriya sa pangisda, dili lamang sa Mati City kon dili apil na sa mga silingang lungsod.
Gibana-banaan nga ang maong establisemento makadumala og di muubos sa 4,000 ka tonelada ka mga isda matag tuig. Kini ng gidaghanon molapas sa gikinahanglang seafood sa tibuok rehiyon sa Davao Oriental.
Gilauman usab nga mahimong usa ka self-operating economic enterprise ang fishport, nga mukita og P5 million kada tuig sa mosunod nga lima ka tuig.
Ang fishport magsilbi isip sentro sa sistematikong mga kalihokan sa commercial fishing sa rehiyon ug magsilbi isip terminal point sa pagdiskarga, pagkarga, ug pagbaligya sa isda ug uban pang mga kahinguhaan sa tubig, inubanan sa mga sanitary nga mga pamaagi aron malikayan ang pagkadaot sa kadagatan ug mapreserbar ang kalidad sa mga produkto sa seafood.
Ang operasyon sa fish port naka-angkla sa City Ordinance No. 561, series of 2023 kon ang City of Mati Fishport Operation and management Ordinance of 2023 nga nagtakda sa mga guidelines alang sa operasyon ug pagdumala niini, inubanan sa gitakdang mga bayronon ug mga silot.
Samtang ang mga barkong pangisda sa dakbayan nga narehistro pinaagi sa Registry System for Basic Sector in Agriculture (RSBSA) Fish-R ug Boat-R tugotan nga makagamit sa mga pasilidad ug makadiskarga sa mga isda nga walay bayad.(Mati CIO)
Hulagway gikan sa Mati CIO