Subay sa tahu sa Davao City Police Office, gibutyag niini nga pasado alas 7 Domingo sa gabii (Oktubre 1), gipara sa pulis si Juvy Batoctoy Serad, 30 anyos ug residente sa Claver, Surigao, del Norte human hapit makabangga ug laing motorista sa paglabay niini sa Prk. Fatima, Brgy Mintal, Tugbok District, Davao City.
Apan inay mohunong, kalit kini misutoy busa gigukod kini sa mga otoridad hangtod nga naabtan. Nakiglalis pa ang suspek sa nidakop kaniya ayha kini niuban sa police station.
Giingong nakainom ang driver atol sa pagkasikop kaniya.
Giklaro sa DCPO nga walay nahitabong pagpangulata sa drayber sukwahi sa nanggawas sa social media nga gikulata kini ayha gipaslak sa prisuhan.
Mismong si Serad ang niingon nga way pagpanion ug pagpangulata nahitabo kaniya atol sa iyang pagkasikop.
Niangkon sab kini nga nakainom sa dihang nagmaneho.
Hulagway gikan sa DCPO