Kini ang katin-awan sa tigpamaba sa Davao City Police Office (DCPO), Major Catherine Dela Rey agig pagpaklaro nga binuhatan sa terorista ang insidente.
Matod ni Dela Rey, di pa masuta kung unsang matang sa bomba ang gigamit sa mga suspetsado nga gitanom sa likod nga bahin sa Honda CRV nga gipanag-iyahan ni Attorney Alberto Magulta nga nakaparada gawas sa iyang Law Office.
Gibutyag ni Dela Rey nga basi sa testimonya sa abogado, posibleng may kalabutan sa iyang trabaho ang motibo sa insidente. Nasayran sa imbestigasyon nga dunay kunoy bug-at nga kaso gihuptan si Attorney Magulta nga posibleng maoy ugat-hinungdan niini.
Wala na hinoon gibutyag ni Dela Rey ang matang sa maong kaso nga gihuptan ni Magulta. Apan dunay hulga nadawat si Magulta ayha pa nahitabo ang insidente. Giklaro sa abogado nga dili taga-Davao City ang sagad sa iyang mga kliyente.
Duha ka persons of interest ang gilantaw sa mga imbestigador nga maoy nagtanom sa explosibo subay usab sa kuha sa closed-circuit television camera (CCTV).
Mas gipalawman sa mga otoridad ang imbestigasyon aron maasuta ang motibo ug madakpan ang mga suspetsado.
Hulagway gikan sa DCPO