Sumala pa kang Colonel Thomas Valmonte, Legal Officer sa CIDG, ang search warrant gipagawas ni Judge Allan Francisco Graciano sa Regional Trial Court (RTC) sa Mandaue City alang sa paglapas sa Republic Act (RA) 10591 o Comprehensive Firearms and Ammunitions Regulation Act.
Sumala pa kang Valmonte, dunay pipila ka mga tag-as ug mugbong armas ug libuang bala ang nakuha sa iyang mga sakop.
Samtang gikumpirma ni PNP Spokesperson Police Colonel Jean Fajardo nga kalakip si Teves sa mga subject sa search warrant sa raid sa CIDG sa HDC Bayawan Agriventures sa Sta. Catalina, Negros Oriental.
Kini tungod kay nakalista isip Presidente sa maong kumpanya si Teves.
Kalakip sab sa mga subject sa search warrant ang pipila pa ka mga opisyal sa kumpanya, subay sa impormasyong gihatag sa mga impormante nga dunay mga nakatagong tag-as nga kalibre sa armas sa nahisgutang kumpanya.
Dugang ni Fajardo dunay pipila ka indibidual gidakop human marekober sa lugar ang mga armas ug mga bala.
Giklaro ni Fajardo nga wala pay impormasyon kung kini ba may kalambigitan sa pagpatay kang Governor Roel Degamo.
Kahinumdumang gibutyag ni Fajardo nga gipalapdan sa PNP ang ilang imbestigasyon sa Degamo murder aron ilakip na sab ang mga nihatag ug proteksyon ug logistics support sa mga direktang nalambigit sa krimen.
Hulagway gikan CIDG