Ang pahayag ni Venturillo, nag-ugat sa nigawas nga tahu sa usa ka environmental group sa Davao City nga dunay Chinese Group on-board sa speedboat giubanan matod pa sa PCG patabok sa isla gikan sa pantalan sa Sasa, Davao City.
Matod pa sa grupo nga pugsanon kuno nga nisulod sa Lucas Property sa Costa Marina sa IGACOS ang grupo sa Chinese kuyog ang mga personahe sa PCG alas 11, Martes sa buntag (Oktubre 4).
Sa pakighinabi sa News Fort kang Venturillo, gibutyag niini nga wala silay kasayuran kung unsa ang katuyuan sa giingong Chinese gruop sa pagsulod sa Samal.
“Gikan sila sa Davao kay di sila gusto mupila sa barge, so nag-request sila nga mutabok na lang sila by speedboat and nag-request for assistance,” pahayag ni Venturillo.
Sumala pa ni Venturillo, mismong mga personahe sa Department of Public Works and Highways (DPWH) matod pa ang nag-request sa ilang estasyon nga magpa-assists kini sa pagtabok sa Samal.
Matod pa sa opisyal, naghangyo matod pa ang taga-DPWH nga kuyugan sila pinaagi sa pag-provide ug security sanglit hasol ug langan na kuno alang kanila ang pagpila aron musakay sa barge.
“Mandato man gyud namo to provide assistance bisan kinsa pa ang magtabok sa Samal. Mao ra gyud to among role didto, wala mi kalabutan sa ilang concern regarding sa property. Wala pod mi kalabutan sa giingong forceful entry,” dugang pasabot ni Venturillo.
Dugang pagpaklaro ni Venturillo nga usa ka aluminum boat nga dunay sakay nga duha ka personahe sa PCG ang gi-provide niini sa grupo sa Chinese ug DPWH patabok sa isla.
Sa pagkasayod ni Venturillo, usa ka Chinese national ang sakay sa usa ka speedboat samtang ang laing speedboat nakasakay usab ang pipila ka personahe sa DPWH.
Subay sa tahu sa environmental group, ang grupo kuno nga sakay sa Speedboat nagtinguha nga maghimog bore holes sa Paradise Reef.
Sa pikas bahin, giklaro usab ni Dean Ortiz, tigpamaba sa DPWH Regional Office 11 nga ang proyektong tulay sa Samal gidumala kini sa ilang central office sa kauluhan ug wala sa rehiyunal nga buhatan.
Apan gipasalig ni Ortiz nga makig-alayon kini sa ilang central office aron ilang mapaklaro ang nahisgutang isyu.
Hulagway gikan sa PCG-IGACOS