“Ang akong opisina ug ang opisina sa DOLE nihimu na ug lakang para madakpan ning mga tawhana. Ang paningkamutan nga kining mga tawhana maka-balo sa leksyon nga walay lugar sa atong syudad ang mga taong dili kabalo magmahal sa iyang isig ka ingun,” pahayag ni Duterte pinaagi sa gipagula nga official statement ning Lunes sa Hapon (Oktubre 3).
Aminado ang kongresista nga nakaabot kaniya ang impormasyon nga adunay mga tao nga nalambigit sa pagpangilad sa gobyerno pinaagi sa TUPAD program sa DOLE.
“Masub-anun ko karon nga bisan paman sa ka-hago sa atong mga amigo sa DOLE,sa mga Brgy officials ug sa akong opisina,daghan mga tao ang wala maka-kuha sa benepisyo sa TUPAD tungod adunay pipila nga ni claim sa maka-daghang higayun gamit ang daghan nga pangalan kada usa ka tao,” matud pa sa kongresista.
Sumala pa sa opisyal, ang kaso sa pagpangawat sa kaban sa gobyerno mamahimong makasuhan ug kriminal labi na nga gibuhat kini sa panahon nga nag-atubang sa krisis ang nasod.
Matod sa kongresista, ang gaba dili magsaba sa mga tawong nalambigit sa anomalya.
“Akong gipanghinaut nga nalipay mo sa inyung gibuhat ug nabusog mo sa inyung kinaon kay sigurado ako nga mas daghan ang nagutman tungod sa inyung binuhatan,”saysay ni Duterte.
Ang TUPAD, usa ka community-based package nga assistance sa gobyerno nga maghatag ug emergency employment alang sa mga nawad-an ug trabaho, underemployed ug seasonal workers, alang minimum period nga napulo ka adlaw, apan depende usab sa matang sa trabaho.