Atol sa press conference Lunes sa hapon (Hulyo 4) sa Headquarters sa DCPO, gibutyag ni Lupaz nga mamahimong patas ang ilang gihimong imbestigasyon sa kasong pagpamusil nga gikalambigitan sa Non-Uniform Personnel (NUP) nga nadestino sa Police Regional Office (PRO) 11 isip usa ka Doktor.
Giingong self-defense ang gihimong pagpusil sa suspek nga si Marvin Rey Andrew Roflo Pepino, 31-anyos sa biktimang si Amir Pulanon Mangacop, residente sa Phase 5, El Rio Subdivision, Bacaca, Brgy. 19-B, ning syudad gumikan matod pa gitabangan kini’g kulata sa grupo sa biktima.
Si Mangacop, gideklarang dead on arrival sa Davao Doctors Hospital human sa nahiagumang pito ka samad pinusilan sa lawas.
Matod pa ni Lupaz, aron way pagdapig-dapig mahitabo sa kaso, nagpadala kini ug abogado sa DCPO aron suportahan ug monitoron ang dagan sa imbestigasyon.
Kini tungod kay ang insidente gikalambigitan sa mga impluwensyadong pamilya.
“We are trying our best na yong lalabas sa investigation ay talagang balance in both parties at saka sa lahat ng mga taong involved. Kaya nga we requested the help ng ating legal service to ensure that what we are doing is talagang correct and fair for everybody,” matod pa ni Lupaz.
Sa pagkakaron, gihulat pa sa mga imbestigador ang kuha sa CCTV camera sa lugar aron matumbok kung duna usab bay tulubagon ang establisiyemento, pagtumbok sa mga kaubanan sa biktima nga maoy nikulata sa doktor nga posible usab nga makasuhan, ingon man pagsuta sa tinuod nga panghitabo. Buot sab sayron ni Lupaz pinaagi sa CCTV footage kung dunay lapses sa bahin sa mirespondeng pulis.
“Pagmakita natin yong CCTV magbabago lahat yon,” matod pa ni Lupaz.
Samtang giklaro sa tigpamaba sa DCPO, Major Ma. Teresita Gaspan nga wala pay nasang-at nga kaso batok sa suspek human matod pa nihangyo kini ug preliminary investigation (PI) sa insidente.
Tumbukon sa PI kung duna bay probable cause o supisyenteng hinungdan aron pagakasuhan ang usa ka suspetsado sa krimen nga gipasangil kaniya.
Posibleng mag-atubang ug kasong murder ang suspek gawas pa sa kasong administratibo nga iyang atubangon sa Philippine National Police (PNP). Kasamtangang naglusad usab ug kaugalingong parallel investigation ang Regional Investigation Detective and Management Division alang sa atubangong administrative liabilities ni Pepino.
Sa pagkakaron, gidoble sa kapulisan ang hugot nga pagpatuman sa liquor ban sa mga establisyemento. Sa pagkakaron, ang liquor ban gipatuman sugod 1 a.m. hangtod 8 a.m. , ug ang selling, serving or consuming of liquor, ug uban pang matang sa alcoholic ug intoxicating drinks sa publiko, hugot nga gidili sulod niing orasa.
Ubos sa ordinansa, ang katapusang pag-order ug ilimnong makahubog sa mga bars gitakda sa 12:30 sa tungang gabii..
Dugang measures gipatuman sa kapulisan aron di na masubli pa nahitabong insidente mao ang pagsiguro sa mga bar owners nga magbutang sa ilang entrance ug warning nga “no firearms allowed inside.”
Hangyo sa opisyal sa mga nanag-iya ug establisiyemento nga magbutang ug security guard aron magcheck sa mga taong gasulod aron masiguro nga walay armas makasulod.
Sa laing bahin, walay laumang paglahugay sa liderato sa San Pedro PNP human sa maong insidente.
Matod pa ni Lupaz, “ As of now very early, we are still preparing everything. Siguro right after we will be able to know kung ano nangyari talaga. As of the moment we are still relying our personnel to do their job para maayos ang problema na to.Wala munang relievan. Kasi the moment i-relieve mo yan, wala nang magtrabaho dyan.”
Samtang sa laing bahin, buot ni Mayor Sebastian Duterte nga mopatuman kini ug mas istriktong guidelines sa liquor ban human sa maong krimen.
Nasayran nga buot sa alkalde nga buhatong mas sayo ang liquor ban.
Colonel Alberto Lupaz, hepe sa Davao City Police Office