Gipasabot ni Police Major Maria Teresita Gaspan, tigpamaba sa Davao City Police Office (DCPO) nga lisod alang sa mga pulis nga muakto sa mga reklamo kung wala kini pormal nga nareport sa kapulisan.
Dugang ni Gaspan atol sa AFP-PNP Press Corps Briefing Miyerkules (Hunyo 1) sa The Royal Mandaya Hotel nga importanteng ma-blotter sa police station ang mga kasong pagpangawat, pagpangoot, ug pagpanglabni aron gilayon kining maaksyunan sa mga awtoridad.
Gihimo ni Gaspan ang pahayag tungod sagad matod pa sa mga biktima o testigo niining mga krimen sa social media na magbagolbol inay idangop sa kuwerpo sa kapulisan.
Dugang sa opisyal nga anaa na hinoon sa social media ang saba sa kasinatian sa pipila ka indibidwal nga mabiktima sa mga kawatan.
Gibutyag niini gikinahanglan usab ma-update sa mga pulis ang ilang rouge gallery o compilation sa mga litrato sa mga suspetsado.
Giawhag usab niini ang pubiko nga magmabinantayanon ug likayan nga magbilin ug mga mahalong gamit sulod sa sakyanan ug labaw sa tanan kanunayng igmat sa palibot.
Aminado kini nga dili malukop sa mga pulis ang pagbantay sa tanang lugar busa gikinahanglan ang kooperasyon ug suporta sa katawhan.
Ingon sa opisyal gaagad lamang usab sila sa ilang imbestigasyon sa kuha sa closed-circuit television cameras (CCTV) sa mga establisyemento.