Giila sa Talomo Police Station ang mga biktima nga sila Panfilo Orosio Manrique, 71-anyos ug ang anak niini nga si Geraldine Eltagonde Manrique, 43-anyos.
Ang suspek mao ang kapuyo ni Geraldine nga si Reo Aquino Ballenas, 30-anyos.
Subay sa migawas nga imbestigasyon, naglalis matod pa ang mga biktima ug ang suspek tungod sa ilang mga kandidato nga gipangbotohan sa milabayng Mayo 9 nga piniliay hangtod nga nisantop sa pagdunggab sa suspek ngadto sa mga biktima gamit ang dose pulgadas nga kutsilyo.
Nasayran nga supporter ni Bongbong Marcos ang mag-amahan samtang laing kandidato usab ang gibotohan sa suspek.
Gisaysay sa usa ka Rex Ronquillo, residente sa naasoyng lugar nga iyang nadunggan nga dunay kasikas sulod sa gipuy-ang balay sa mga biktima ug dinhi iyang nakita ang suspek nga migawas ug midagan pagawas sa balay nga duguan ang tuong-kamot niini.
Nisyagit pa daw kini nga “PATYA KO KOL, KAY NAPATAY NAKO SILA,” matod pa sa saysay ni Rex.
Tulo ka mga bata nga anaa sulod sa balay sa mga biktima ug suspek naluwas ni Rex kinsa Liason officer sa First Pacific Motors.
Paspas nga nadakpan sa mga otoridad si Reo Ballenas nga anaa sa kustodiya sa Talomo Police Station samtang gihikay ang kasong atubangon batok kaniya.
Tambag ni Major Noel Villahermosa, hepe sa Talomo Police sa mga magkabangi sa gisuportahang kandidato nga dili magpadala sa emosyon aron likay sa krimen ug ang pinaka-importante dawaton ang unsa mang desisyon sa tingog sa mayoriyang mga Filipino.
Hulagway gikan sa DCPO