Giangkon ni DILG 11 direktor Alex Roldan atol sa press conference Miyerkules sa The Royal Mandaya Hotel nga nakadawat ang iyang opisina nga dunay mga barangay kapitan nagabalibad sa usa ka kandidato nga ipagamit ang usa ka bakanteng luna sa rason nga duna na kunoy nakakuha sa lugar.
Apan sumala pa sa opisyal, ang tinuod diay, dili gusto ipagamit sa opisyal sa barangay ang open space tungod kay di kini niya ka-alyado.
Gipamugos ni Roldan nga bisan ug magpakita sa iyang pagka-bias ang mga opisyal sa barangay, kinahanglan gihapon nga mahimong makaangayon kini sa tanan isip kabahin sa demokrasya sa nasod.
Wala man hinganli ni Roldan kinsa kining mga opisyal sa barangay, apan hugot kining nagpasidaan nga posibleng mag-atubang kini ug reklamo kung padayong mubalibad sa hangyo sa mga dili ka-alyado.